جدیدترین :

فستیواڵی نەورۆزی تەرەغە،لە سەر کێوی تەرەغەی بۆکان بەڕێوە چوو

فستیواڵی نەورۆزی تەرەغە،لە سەر کێوی تەرەغەی بۆکان بەڕێوە چوو

ئەمڕۆهەینی ڕێکەوتی ۲۷ڕەشەمە،وەک دوایین جومعەی ساڵ،فستیواڵی ساڵیانەی نەورۆزی تەرەغە،بە بەشداری زۆربەی چین وتوێژەکان، شاخەوانەکان و وەرزشکاران و هەروەها بەشداری بەرچاوی گرووپە ژینگەپارێزییەکانی شاری بۆکان و ناوچە بە ڕێوە چوو.
لەم ڕێوڕەسمەدا کە چەندین ساڵە لە دوایین جومعەی ساڵدا بەڕێوە دەچێ،ڕێژەیەکی زۆر لە خەڵکی شاری بۆکان و شار و دێهاتەکانی دەورووبەر بۆ دەربڕینی شادی وخۆشی بە بۆنەی جەژنی نەتەوەیی نەورۆز و پێشوازی لە ساڵی نوێ،بەشدار دەبن و دەچنە سەر لووتکەی ئەو کێوە بەرزە و لەوێ ئاگری نەورۆز دەکەنەوە.
ئەمساڵیش وەک ساڵانی ڕابردوو،وێڕای بەشداری بەرچاوی خەڵک،ئەنجومەنە ژینگەیی یەکان و لەوانە ئەنجومەنی ژینگە پارێزیی وڵات،بەشداری چڕ و پڕیان هەبوو و وەک چالاکییەکی فەرهەنگی و ئەرکێکی ژینگەیی،بە چاندنی چەندین نەمام لە داوێنی کێوی تەرەغە، پەیامی ژینگەخۆشەویستی و ژینگەپارێزیی خۆیان بۆ جەماوەری بەشدار لەو فستیواڵەدا و هەموو خەڵک،دەربڕی.
لە درێژەی ئەو بەرنامەدا ئەنجومەنی ژینگەپارێزیی وڵات وەک نوێنەری ڕێکخراوە ژینگەیییەکان (سازمان مردم نهاد)و باڵوێزی ژینگەپارێزیی بۆکان وناوچە،۱۰ دانە کەویان، بۆ بەرز ڕاگرتنی جەژنی نەورۆز و نوێ بوونەوەی سروشت،لەقەفەس ئازاد کرد،شایانی باسە کە ئەو کەوانە ئیدارەی موحیتی زیستی بۆکان لە چەندین عەمەلیاتدا دەستی بە سەردا گرتبوو و ئەرکی ئازادکرنیانی سپارد بەو ئەنجومەنە ژینگەپارێزییە و هاوکات تێعدادی ۱۰۰ دانە قەفەسی کەویش بەدەستی ژینگەپارێزانی وڵات ئاگر تێبەردرا و ئاگری نەورۆزی ئەمساڵی بۆکان، بە ئاگر تێبەردانی ئەو قەفەسانە گڕ و تینێکی جیاوازتر لە هەموو ساڵێکی هەبوو.
لە میانەی ئەو فستیواڵەدا بە داخێکی یەکجار زۆرەوە،لاوێکی تەمەن ۲۶ساڵی بە ناوی فەرهادحاجی محەممەدی،دانیشتووی شاری بۆکان بە هۆر کەوتنی بەردێک بە سەر سەری دا،تووشی برینی قووڵ دەبێت و بە داخەوە لە ڕێگای نەخۆشخانە گیانی لە دەست دا.

جوابی بنویسید

ایمیل ها معلوم نمیشود

کلیه حقوق مادی و معنوی برای انجمن سبز چیا محفوظ می باشد